أحمد حلمي لطلاب الثانوية العامة: "ماتخافوش أنا سقطت 3 مرات"
حكى الفنان المصري أحمد حلمي، تجربته مع الثانوية العامة، وحرص على توجيه رسالة للطلاب الذين بدأو امتحاناتهم اليوم الأحد.
ونشر "حلمي" فيديو عبر حسابه الشخصي على "انستجرام"، قائلًا:" الفيديو ده مخصوص لطلاب وطالبات الثانوية العامة، بما إن الامتحان بكره، وبما إننا بنتكلم عن الثانوية العامة فأعتقدت إن مفيش أفضل مني يتكلم عن الثانوية العامة غيري لأني خبرة؛ وسقطت فيها 3 سنين".
وأضاف:"أنا عايزة أقولكم أني كنت بسقطت في الثانوية العامة لأني حقيقي كُنت ببقى خايف من الامتحانات، السنة الوحيدة إللي أنا مخوفتش منها من الامتحان سقطت برضوا بس سقطت لأني اكتشفت أني كنت عامل نفسي مش خايف لكن كنت خايف".
وتابع:"حقيقي إن السنة إللي مسقطتش فيها هي السنة اللي مكنتش خايف من الامتحان بجد، وكنت بتعامل معاها على أن الامتحان عبارة عن فسفوسة، أيه امتحان الثانوية العامة؟ هيعمل فيا أيه امتحان الثانوية العامة ده؟ هيموتني؟ ما أنا حلو وجميل وبصحتي وزي الفل، هيحدد مستقبلي؟ ما يحدده، أنا هذاكر وأعمل إللي عليا.. هنام كويس وأصحى أكل كويس وهروح الامتحان صافي وتمام ومش هخاف ومضيعش وقتي في الخوف، مضيعش ومضيعيش وقتك في أنك خايف أو خايفة والرعب، امتحان الثانوية العامة فسفوسة متخدش بالك منها".
واختتم حديثه قائلًا:"هتحلوا الامتحان لما تركزوا في إنكم مش خايفين، وتركزوا إن في دماغكم معلومات، ركزوا ومضيعش وقتك في الخوف والرعب، وهتحلوا الامتحان وهبقوا جادين وتجيبوا المجموع وهتدخلوا الكليات إللي نفسكوا فيها".
